असार ३१, २०७६
काठमाडौं–विद्युत् प्राधिकरणका ४ वटा गाडी ऊर्जा जलस्रोत तथा सिंचाइ मन्त्री, उनको सचिवालय र ऊर्जा सचिवले प्रयोग गर्ने गरेको समाचार लोकान्तरमा प्रकाशित भएपछि त्यसमध्ये ३ वटा गाडी फिर्ता भएको पाइएको छ ।
विद्युत् प्राधिकरणले गत चैतमा लोकान्तरलाई उपलब्ध गराएको सूचनामा बा१३च ५७९३ र बा१ञ २४५२ नम्बरको प्राडो तथा बा२०च ४१५ र बा२०च ४१४ नम्बरका इलेक्ट्रिक कारमध्ये एउटा गाडी मन्त्री वर्षमान पुन अनन्त, २ वटा उनको सचिवालय र अर्को एउटा ऊर्जा सचिव दिनेश घिमिरेले चढ्दै आएको उल्लेख थियो ।
यसमध्ये ऊर्जा मन्त्रीले चढ्दै आएको एउटा इलेक्ट्रिक कारलाई छाडेर प्राधिकरणका सबै गाडी फिर्ता भइसकेको मन्त्रालयका आन्तरिक प्रशासन शाखा प्रमुख नरबहादुर बूढाले लोकान्तरलाई जानकारी दिए ।
यता विद्युत् प्राधिकरणका सह–निर्देशक मोतिलाल महताराले मन्त्रालयमा गएकामध्ये २ वटा गाडी फिर्ता भएको पुष्टि गरे । बा२०च ४१४ नम्बरको इलेक्ट्रिक कार र बा१ञ २४५२ नम्बरको प्राडो फिर्ता भइसकेको उनले बताए ।
५७९३ नम्बरको गाडी भने हाल कर्णाली प्रदेशका मुख्यमन्त्री महेन्द्रबहादुर शाहीले प्रयोग गरिरहेको पाइएको छ । मुख्यमन्त्री शाही पूर्व ऊर्जामन्त्री समेत हुन् ।
मन्त्रालयका आन्तरिक प्रशासन शाखा प्रमुख बूढाले मन्त्रीसँग अहिले विद्युत् प्राधिकरणको इलेक्ट्रिक कार र कारगेडका लागि गृहमन्त्रालयले उपलब्ध गराएको गाडी मात्र रहेको बताए ।
'मन्त्रीज्यूले विद्युत् प्राधिकरणको इलेक्ट्रिक कार चढ्ने गर्नुभएको छ,' बूढाले भने, 'राजधानीबाहिर जानुपर्दा सम्बन्धित योजनाहरूको गाडी मागेर प्रयोग गर्नुहुन्छ ।'
मन्त्रीका निजी सचिव कमानसिं थापा मगरले बा२झ १३७७ र स्वकीय सचिव दुर्गाप्रसाद चापागाईंले बा२झ ९५ नम्बरको गाडी चढ्ने गरेको उनको भनाइ छ ।
स्रोत : लोकान्तर अनलाइन