बुधवार, माघ १६, २०७५
नेपाल चार्टर्ड एकाउन्टेन्ट्स संस्था (आइक्यान)ले एक वर्षमा करिव सात दर्जन चार्टर्ड एकाउन्टेन्ट (सिए) तथा दर्तावाल लेखाव्यवसायीविरुद्ध उजुरी परेको जनाएको छ । लेखापरीक्षण व्यवसायलाई व्यवस्थित र विश्वासयोग्य बनाउनका लागि संस्था सक्रिय भएको र अधिकांश उजुरीको छानबिन गरी कारवाही अघि बढाइएको अध्यक्ष जगनाथ उपाध्यायले बताए ।
आइक्यानको २२ औं वार्षिकोत्सव र लेखा व्यवसाय तथा अबको बाटोसम्बन्धी एकदिवसीय सम्मेलनबारे जानकारी दिन मंगलबार आयोजित पत्रकार सम्मेलनमा अध्यक्ष निरौलाले लेखाव्यवसायको विकास, संरक्षण र सवद्र्धन गर्न संस्थाको भूमिका प्रभावकारी बनाइएको बताए । लेखा व्यवसायको प्रवद्र्धन, जनशक्ति उत्पादन, लेखाव्यवसायीको अनुमति प्रमाणपत्र दिने र लेखाव्यवसायीलाई अनुशासनको कारवाही गर्ने अर्धन्यायिक निकायका रूपमा रहेको संस्थाले नेपाली लेखाव्यवसाय शिक्षा र लेखा परीक्षणलाई अन्तर्राष्ट्रियस्तरको बनाउन विभिन्न कार्यक्रम लागू गरिएको समेत उनले जानकारी दिए ।
संस्थाले आफ्नो वार्षिकोत्सवका अवसरमा आगामी बिहीबार गर्ने सम्मेलनमा लेखाव्यवसायका विविध विषयमा छलफल हुने जनाएको छ । यसअन्र्तगत डाटा सुरक्षा (ब्लकचेन) र वित्तीय बजारको बारेमा छलफल हुनेछ । यसैगरी लेखामा कसरी गुणस्तरीयता प्रदान गर्न सकिन्छ र कुन आधारमा गुणस्तरको आश्वस्तता दिलाउन सकिन्छ भन्ने विषयमा जानकारी गराउने तथा कार्यपत्र प्रस्तुत गरिने कार्यक्रम छ । यस्तै संस्थागत सुशासनका लागि व्यवसायिक लेखापालकको भूमिकाका साथै संस्थागत सुशासन रिपोर्टिङ सम्बन्धमा जानकारी गराउने अध्यक्ष उपाध्यायले जानकारी दिए ।
एकदिवसीय कार्यक्रमको अन्तिम सत्रमा नेपालमा बैंक तथा वित्तीय संस्था र बिमा क्षेत्रमा लागू गरिएका नेपाल वित्तीय प्रतिवेदनका सम्बन्धमा अनुभव आदान प्रदान गरिने कार्यक्रम राखिएको छ । जसमा बैंक तथा वित्तीय संस्थाका प्रतिनिधिका साथै बिमा क्षेत्रका प्रतिनिधिहरूको सहभागिता रहने जनाइएको छ । सम्मेलनबाट लेखापरीक्षण व्यवसायमा देखिएको समस्या र समधानका उपायका बारेमा छलफल हुनुका साथै आमजनताले चार्टर्ड एकाउन्टेन्टले गरेको कामलाई विश्वासमय दिलाउन सहयोग पुग्ने बताइएको छ ।
हाल आइक्यानमा १ हजार ३ सय ३७ चार्टर्ड एकाउन्टेन्ट्स सदस्य र ७ हजार २ सय ५९ दर्तावाला लेखापरीक्षक सदस्य छन् भने चार्टर्ड एकाउन्टेन्सी शिक्षाको विभिन्न तहमा गरी करिव १४ हजार विद्यार्थी अध्ययनरत छन् । संस्थाले स्वदेशमै न्यून शुल्कमा लेखाव्यवसायका लागि आवश्यक पर्ने उच्च जनशक्ति उत्पादन गरिरहेको छ र लेखाव्यवसायलाई अन्तर्राष्ट्रिय मापदण्डअनुसार बनाउन लेखापरीक्षणमान तथा नेपाल वित्तीय प्रतिवेदनमानको सफल कार्यान्वयनमा समेत भूमिका खेल्दै आएको छ । यसैगरी लेखाव्यवसायीले प्रदान गर्दै आइरहेको सेवामा गुणस्तर कायम गर्न ‘क्वालिटी एसुरेन्स रिभ्यु’ को माध्यमबाट गुणस्तर परीक्षण कार्यको समेत थालनी गरिसकेको जनाएको छ ।
स्रोत : कारोबार दैनिक